الجمعة، 22 مارس 2013

أنا بدأت بنفسى




عارف لما يبقى نفسك تلاقى أصحاب محترمين ودمهم خفيف ومحدش فيهم يسالك عند تيارك ولا دينك ولا معاك فلوس كام ولا يا ترى يا هل ترى انت متجوز ولالا
عارف بقى لما يبقى نفسك اكتر تستريح من وش الإعلام  والقتل والضرب والخناقات والصراع  الدائم على السلطه والمتاجره ببساطتنا  واحلامنا الصغيره  على شاشتهم الكتيره   .
الراحه النفسيه اللى اصبح كل فرد من الشعب المصرى بيفتش عليها فى كل تفصيله صغيره ف حياته  فى لبسه فى أكله فى الاماكن اللى بيقعد فيها وفى الناس الجديده اللى ممكن انه يتعرف عليها كل يوم فى شغله او فى الشارع أنا لقيتها مع الفريق ده فريق (أنا بدأت بنفسى )  علمونى حاجات كتير اوى من حبهم لعملهم والألفه والروح الطيبه اللى فى تعاملهم مع بعض حسيت معاهم  انى لازم اخرج أحسن ما عندى مش بتصنع ولا بالكدب . بس هم من غير ما اشعر خلونى حاسه انى عاوزه اوهب لهم أحسن ما عندى .



هم دول الشباب اللى طاقتهم الإيجابيه بتقضى على أى شر يكون موجود فى مكان هم فيه .
عرفت معاهم فعلا ان واجبى أسمع كلام قلبى واعمل اللى ضميرى مستريح له ما اصنفش حد واتعامل معاه ع الاساس ده لان كلنا واحد واللى خلق البشر واحد
طول ما انت حاسس انك لازم تساعد مد ايدك وساعد ما تندمش لان انت بجد
بطل حياتك وفى ايدك تكون بطل فى حياة ناس تانيين باختيارهم بكم السعاده اللى ممكن تساعد فى رسمها على وشوش الناس دى كل يوم .
مع فريق أنا بدأت بنفسى باحس كل يوم ان طاقتى بتتجدد حتى لو كنت هلكانه من التعب لانهم مش بيبحسو عن حاجه فى الدنيا الناس دى تفننت بجد فى اسعاد أرواحهم وارواح الناس اللى حواليهم ومش عاوزين حاجه من حد فعلا غير رضى ربنا عنهم وعن العمل اللى بيعملوه لوجهه الكريم .
مع فريق أنا بدأنت بنفسى حسيت انى بدأت ادوب الفوارق  والحواجز اللى تراكمت على مدار السنين وعششت جوه قلوب الشعب المصرى مش من الثوره زى ما بيقولو لا دى كانت نتيجة نظام فاسد من الاساس بعدنا فيه عن قيمنا الجميله
امبارح بس وانا معاهم حسيت ان الدنيا لسه بخير وان صفات الشعب المصرى الجميله عمرها ما هتفنى الا بفناء الدنيا
مع فريق أنا بدأت بنفسى استشعرت حديث رسول الله صلى الله عليه وسلم ( الخير فى وفى أمتى الى يوم القيامه )
صدقت يا حبيبى يا رسول الله .
امبارح أنا بدأت معاهم بنفسى .... خليها بدايتك انت كمان وانضم لحملة أنا بدأت بنفسى    ....... وخليك فاكر ان انت بطل حياتك .

هناك تعليقان (2):

للاتصال بى

foxyform